సల్మాన్‌ - షారుఖ్‌.. ఇషాఖ్‌బాజీ!!



షారుఖ్‌ ఖాన్‌ మరుగుజ్జు పాత్రలో తొలిసారి నటిస్తోన్న చిత్రం ‘జీరో’. ఆనంద్‌ ఎల్‌.రాయ్‌ దర్శకత్వంలో తెరకెక్కిన ఈ చిత్రాన్ని.. షారుఖ్‌ సతీమణి గౌరీ ఖాన్‌ నిర్మిస్తున్నారు. కత్రినా కైఫ్, అనుష్క శర్మ కథానాయికలుగా నటిస్తున్నారు. సల్మాన్‌ ఖాన్, కాజోల్, రాణీ ముఖర్జీ, శ్రీదేవి, ఆలియా భట్, దీపికా పదుకొణె కరిష్మా కపూర్‌ తదితరులు అతిథి పాత్రల్లో మెరవబోతున్నారు. డిసెంబరు 21 ఈ సినిమా ప్రేక్షకుల ముందుకొస్తోంది. ఈ నేపథ్యంలో ప్రచార కార్యక్రమాల్లో భాగంగా షారుఖ్‌ - సల్మాన్‌లపై చిత్రీకరించిన ‘ఇషాఖ్‌బాజీ’ గీతాన్ని విడుదల చేశారు. ఈ పాట ఆద్యంతం కత్రినా చుట్టూనే తిరుగుతుంది. ఇందులో కత్రినా ప్రేమను పొందడం కోసం షారుఖ్‌ - సల్మాన్‌ పోటీపడుతూ కనిపించారు. ‘‘తనని నేను గాఢంగా ప్రేమిస్తున్నాను’’ అని షారుఖ్‌ అంటే.. ‘‘తను నన్ను గాఢంగా ప్రేమిస్తోంది’’ అంటూ సలల్మాన్‌ పాట రూపంలో బదులివ్వడం ఆకట్టుకుంది. ఇలా అగ్రతారలిద్దరూ కత్రినా ప్రేమ కోసం హుషారుగా ఆడిపాడుతూ కనిపించారు. ఈ గీతానికి గణేశ్‌ ఆచార్య నృత్యరీతులు సమకూర్చగా.. అజయ్‌ అతుల్‌ స్వరాలు అందించారు. ఇప్పటికే విడుదలైన ట్రైలర్, పాటలకు మంచి ఆదరణ లభించిన నేపథ్యంలో సినిమాపై మంచి అంచనాలేర్పడ్డాయి.



Copyright 2019 USHODAYA ENTERPRISES PVT LTD, ALL RIGHTS RESERVED.
Powered by WinRace Technologies.