తెల్లదొరలపై.. తెలుగు వీరుల పోరు
తెరపై హీరోయిజం అన్నది సప్తవర్ణ శోభితం..
అది నవరసభరితం..
ఎన్ని తరాలు మారినా.. వెండితెర ఎన్ని రంగులు పులుముకున్నా.. నిత్యం సినీప్రియులకు వినోదాల విందును పంచేది హీరోయిజమే..
వెండితెరపై హీరోయిజాన్ని పండించడానికి రకరకాలు దారులున్నాయి..
కొన్నిసార్లు అది తన కుటుంబానికి అండగా నిలుస్తుంటుంది..
మరొకసారి ప్రియురాలితో తన ప్రేమను గెలిపించుకోవడం కోసం అలుపెరుగని పోరాటం చేస్తుంటుంది..
ప్రతినాయకుల పీడవదిలించి ప్రజల మోముల్లో సంతోషం నింపుతుంది..
రాజకీయాలకు పట్టిన చీడను చిదిమేసి సుపరిపాలను అందిస్తుంది..
ఇలా తెరపై హీరో ఎలాంటి పాత్రలు చేసినా అది ప్రేక్షకుల మోముల్లో వెలుగులు నింపడానికే..
అయితే కథానాయకులు ఎన్నిరకాల హీరో పాత్రలు చేసినా.. వాళ్లు సినీప్రియుల మదిలో రియల్‌ హీరోలుగా చిరస్థాయిగా మిగిలడానికి చేసే తొలి పని ఏంటో తెలుసా!
తెల్లవాడి గుండెల్లో కసిగా కత్తి దింపడమే..
ఇది వెండితెరపై ఎవర్‌గ్రీన్‌ హిట్‌ ఫార్ములా...
హీరోయిజానికి ఓ సరికొత్త శక్తిని అద్దుతూ.. ప్రేక్షకుల్లో దేశభక్తిని రగిలిస్తుంది..
ఒకసారి అలాంటి పాత్రల్లో నటించాక ఏ నటుడైనా సినీప్రియుల్లో రియల్‌ హీరోగా మారిపోక తప్పదు..
అందుకే ప్రతినటుడూ తన సినీకెరీర్‌లో ఒక్క స్వాతంత్య్ర సమరయోధుడి పాత్రలోనైనా నటించాలని ఉవ్విళ్లూరుతుంటాడు..


ప్పుడు తెరపైకి ‘సైరా నరసింహారెడ్డి’గా అడుగుపెట్టబోతున్న చిరంజీవిని సైతం ఇలాంటి కలే 12 ఏళ్ల పాటు కుదురుగా ఉండనివ్వలేదు. కానీ, ఎట్టకేలకు ఆ కల ఇప్పుడు వెండితెరపై సందడి చేసేందుకు సిద్ధమైంది. కానీ, ఆయన కన్నా ముందుగానే తెలుగు తెరపై స్వాతంత్య్ర సమరయోధులుగా సందడి చేసి మెప్పించిన అగ్ర తారలు కొందరు ఉన్నారు. వీరిలో సూపర్‌స్టార్‌ కృష్ణను తెలుగు తెరపై సమరయోధుల కథలకు ఊపిరిలూదిన హీరోగా చెప్పుకోవచ్చు. ఆయన చేసిన ‘అల్లూరి సీతారామరాజు’ చిత్ర విజయమిచ్చిన స్ఫూర్తితో తర్వాతి తరంలో వచ్చిన ప్రతి అగ్ర హీరో ఆ బాటలో నడిచి తమ కలను నిజం చేసుకోవడంతో పాటు మంచి విజయాలను ఖాతాలో వేసుకున్నారు. కొందరు నిజమైన సమరయోధుల జీవిత కథల్లో నటించి మెప్పిస్తే.. మరికొందరు కల్పిత గాథలతో కనిపించి బ్రిటిష్‌ వారిపై అలుపెరుగని పోరు చేసి ప్రేక్షకుల్లో దేశభక్తిని రగిలించారు. ఇలా తెలుగు తెరపై ఇప్పటి వరకు వచ్చిన స్వాతంత్య్ర సమరయోధుల జీవితగాథలను పరిశీలిస్తే.. ముందుగా అందరికీ గుర్తొచ్చేది మన్యం వీరుడు అల్లూరి విజయగాథే.

* అల్లూరి సీతారామరాజుతో ఆరంభం..


స్వాతంత్రోద్యమ నేపథ్యంతో తెరకెక్కిన చిత్రాలనగానే తెలుగులో అందరి మదిలో మెదిలో తొలి చిత్రం ‘అల్లూరి సీతారామరాజు’. ఇప్పుడీ బాటలో వస్తోన్న విప్లవ వీరుల చిత్రాలన్నింటికీ ఈ అల్లూరే స్ఫూర్తి. స్వతంత్రం కోసం బ్రిటీష్‌ పాలకుల్ని ఎదురించి ప్రాణాలు అర్పించిన మన్యం వీరుడు అల్లూరి సీతారామరాజు జీవితాధారంగా సూపర్‌స్టార్‌ కృష్ణ ఈ చిత్రాన్ని నిర్మించారు. కృష్ణ చేసిన ఈ సాహసం అప్పట్లో ఓ సంచలనం. అప్పట్లో ఈ కథ ఎన్టీఆర్, ఏయన్నార్, శోభన్‌ బాబు వంటి వారి వద్దకు వెళ్లినా ఈ తరహా కథలు ఎవరు చూస్తారనే ఉద్దేశంతో ఇందులో నటించేందుకు ముందుకు రాలేదు. కానీ, కృష్ణ మాత్రం సాహసించి అపురూప దృశ్యకావ్యాన్ని తెలుగు ప్రేక్షకులకు అందించారు. ఆయన 100వ సినిమాగా వచ్చిన ఈ చిత్రం అప్పట్లో 19 కేంద్రాల్లో శత దినోత్సవం జరుపుకుంది. తెలుగులో వచ్చిన తొలి కలర్‌ చిత్రంగానూ రికార్డు సృష్టించిందీ చిత్రం. తెల్లవాడి తుపాకీ గుండెలపై ఉన్నా స్వాతంత్య్ర నినాదమే శ్వాసగా చివరి రక్తపు బొట్టు వరకు బ్రిటిష్‌ వారితో పోరాడి కోట్లాది మందిలో పోరాట స్ఫూర్తిని రగిలించారు.

* తెల్లవారిని హడలెత్తించిన ‘భారతీయుడు’..


బ్రిటిష్‌ వారి గుండెల్లో రైళ్లు పరిగెత్తించిన తర్వాతి తరం హీరోల్లో కమల్‌హాసన్‌ పేరును చెప్పుకోవాలి. కమల్‌ కథానాయకుడిగా శంకర్‌ తెరకెక్కించిన ‘భారతీయుడు’తో ఈ అద్భుత దృశ్యం తెరపై ఆవిష్కృతం అయింది. వాస్తవానికి ఈ చిత్రం ఆద్యంతం ఇదే బ్యాక్‌డ్రాప్‌లో నడవదు. కేవలం సేనాపతి ఫ్లాష్‌ బ్యాక్‌ ఎపిసోడ్‌లో మాత్రమే ఈ తెల్లవారిపై పోరు కనిపిస్తుంది. ఈ పోరాటాన్నే ఆయుధంగా చేసుకోని ఆ తర్వాత అవినీతిపరుల గుండెల్లో రైళ్లు పరిగెత్తిస్తాడు సేనాపతి. ఇలా ఓ అద్భుతమైన సమరయోధుడిగా కమల్‌ ఒదిగిపోయిన విధానానికి, ఆ పాత్రలో ఆయన పండించిన హీరోయిజానికి ప్రేక్షకుల నుంచి మంచి ఆదరణ లభించింది. అప్పట్లో ఈ చిత్రం దేశవ్యాప్తంగా సంచలన విజయాన్ని అందుకొంది.

* బోస్‌గా మారి ముచ్చట తీర్చుకున్న వెంకీ..


నేతాజీ సుభాష్‌ చంద్రబోస్‌ కథ స్ఫూర్తితో వెంకటేష్‌ కథానాయకుడిగా ప్రముఖ దర్శకుడు రాఘవేంద్ర రావు తెరకెక్కించిన చిత్రం ‘సుభాష్‌ చంద్రబోస్‌’. ఈ చిత్ర నేపథ్యం కూడా బ్రిటిష్‌ వారిపై పోరాటం నేపథ్యంలోనే సాగుతుంది. అయితే ఇది నిజ జీవిత గాథ కానప్పటికీ.. ప్రముఖ స్వాతంత్య్ర పోరాట యోధుడు సుభాష్‌ చంద్రబోస్‌ పోరాట స్ఫూర్తితో తెరకెక్కించడం విశేషం. ఇందులో వెంకీ రెండు భిన్న పాత్రల్లో కనిపిస్తాడు. ఫ్లాష్‌బ్యాక్‌లో తెల్లవారిపై అల్లుపెరుగని పోరు చేసి వీరమరణం పొందిన యోధుడు చంద్రబోస్‌గా కనిపించగా.. మరో పాత్రలో నేటి తరానికి ప్రతినిధిగా కనిపించి అలరిస్తాడు.

* గౌతమిపుత్ర శాతకర్ణితో బాలయ్య..


తెలుగు తెరపై సందడి చేసిన సమరవీరుల కథలకు కాస్త భిన్నమైనది బాలకృష్ణ ‘గౌతమీపుత్ర శాతకర్ణి’. కానీ, అంతర్లీనంగా మాత్రం స్వతంత్ర కాంక్షే దర్శనమిస్తుంది. వివిధ రాజ్యాలుగా విడిపోయిన భారతదేశాన్ని ఓకే తాటిపైకి తీసుకురావాలని తల్లి చెప్పిన మాటకు కట్టుబడి దేశం కోసం యుద్ధాలు చేసిన ఓ వీరుడి కథే ‘గౌతమిపుత్ర శాతకర్ణి’ చిత్రం. ఇందులో శాతకర్ణిగా బాలకృష్ణ శత్రువులను కత్తిదూస్తూ తన పోరాటంతో తెరపై ఓ అద్భుతమైన హీరోయిజాన్ని చూపించారు. క్రిష్‌ జాగర్లమూడి దర్శకత్వంలో తెరకెక్కిన ఈ చిత్రం బాక్సాఫీస్‌ వద్ద కాసుల వర్షం కురిపించింది.

* ‘రాజన్న’గా నాగ్‌ సైతం..


ఓవైపు తెల్లవారిపై పోరు.. మరోవైపు నిజాం నవాబుకు వ్యతిరేకంగా కర్కశ రజాకార్ల పోరాటం. ఈ రెండు నేపథ్యాలతో అల్లుకున్న దేశభక్తి చిత్రమే ‘రాజన్న’. టైటిల్‌ పాత్రను నాగార్జున పోషించారు. దేశవ్యాప్తంగా బ్రిటిష్‌ వారి అరాచక పాలన ముగిసినా ఆ స్వాతంత్య్రపు సువాసనలు అందుకోలేని నిజాం రాజ్యంలో అటు రజాకార్లపై వారికి అండగా నిలుస్తున్న తెల్లదొరలపై అలుపెరగని పోరాటం చేసి వీర మరణం పొందుతాడు రాజన్న. ఈ పాత్రలో నాగార్జున ఒదిగిపోయిన విధానం.. ప్రముఖ రచయిత, దర్శకుడు విజయేంద్ర ప్రసాద్‌ సినిమాను తెరకెక్కించిన తీరు, మల్లమ్మ పాత్ర.. చిత్ర విజయంలో కీలక పాత్ర పోషించాయి.

* స్వీటీ రుద్రమదేవిగా మారిన వేళ..


స్వాతంత్ర్య పోరాటం అనగానే ఉయ్యాలవాడ, అల్లూరి, సుభాష్‌ చంద్రబోస్‌ వంటి పోరాట వీరులే కాదు.. రుద్రమదేవి, ఝాన్సీ లక్ష్మీబాయి అపర కాళికలూ గుర్తొస్తారు. వీరిలో రుద్రమదేవి జీవితాధారంగా దర్శకుడు గుణశేఖర్‌ అనుష్కతో చేసిన సాహసమే ‘రుద్రమదేవి’. ఇది కూడా ప్రేక్షకుల్లో దేశభక్తిని రగిలించింది. ఇందులో రుద్రమదేవి పాత్రతో కదన రంగంలో శత్రువుల గుండెల్లో అనుష్క కత్తులు దూసిన తీరు.. గోనగన్నా రెడ్డిగా అల్లు అర్జున్‌ కనబర్చిన నటన తెరపై అద్భుత విజయాన్ని అందించాయి. ఈ సినిమాతోనే తెలుగు ప్రేక్షకులకు తొలిసారి ఓ వీరనారి పోరాటాన్ని తెరపై దర్శించుకునే వీలు దక్కింది.

* సై సై.. ‘సైరా’..


దేశంలో సిపాయిల తిరుగుబాటు కన్నా ముందే తెల్లవారిపై పోరుకు సై అన్న తొలి స్వాతంత్ర్య వీరుడు ఉయ్యాలవాడ నరసింహారెడ్డి. ఆయన పోరాట స్ఫూర్తితోనే దేశంలోని వివిధ ప్రాంతాల్లో వేలాదిమంది విప్లవ వీరులు పుట్టుకొచ్చారు. కానీ, ఈ తొలి స్వాతంత్య్ర సమరయోధుడి కథ చరిత్ర పుటల్లో ఎప్పుడో మసకబారిపోయింది. అందుకే ఇప్పుడీ యోధుడి పోరాట గాథను ‘సైరా’ రూపంలో యావత్‌ భారతావనికి కానుకగా అందించబోతున్నారు చిరంజీవి. ఆయన కథానాయకుడిగా నటించిన ఈ చిత్రం గాంధీ జయంతి కానుకగా.. అక్టోబరు 2న ప్రేక్షకుల ముందుకు రాబోతుంది. దీనికి సురేందర్‌ రెడ్డి దర్శకుడిగా వ్యవహరించగా.. రామ్‌చరణ్‌ నిర్మించారు.

* అల్లూరి + కొమురం భీమ్‌ = ‘ఆర్‌.ఆర్‌.ఆర్‌’..


ఇప్పటి వరకు వెండితెరపై ఒక స్వాతంత్య్ర యోధుడి కథనే వీక్షించిన ప్రేక్షకులకు.. ఒకేసారి అటు మన్యం వీరుడు అల్లూరి కథను, ఇటు గిరిజన వీరుడు కొమరం భీం జీవిత గాథను చూపించబోతున్నారు దర్శకధీరుడు రాజమౌళి. ఆయన నుంచి రాబోతున్న ‘ఆర్‌.ఆర్‌.ఆర్‌’ చిత్రంతో ప్రేక్షకులకు ఈ సాహసాన్ని రుచి చూపించబోతున్నారు. ఇప్పుడీ చిత్రం కోసమే ఆదివాసీల పోరాట వీరుడు కొమురం భీమ్‌ పాత్రలోకి ఎన్టీఆర్‌ పరకాయ ప్రవేశం చేయబోతుండగా.. మన్యం వీరుడు అల్లూరి పాత్రలో ఒదిగిపోయేందుకు రామ్‌చరణ్‌ సిద్ధమయ్యారు. మరి వీళ్లిద్దరూ కలిసి స్వాతంత్య్ర పోరాటంలో ఎలా పోరు సలిపారో చూడాలంటే వచ్చే ఏడాది వరకు వేచి చూడక తప్పదు. దాదాపు రూ.350 కోట్ల భారీ బడ్జెట్‌తో అత్యంత ప్రతిష్ఠాత్మకంగా రూపుదిద్దుకుంటోన్న ఈ చిత్రంపై ఇప్పటికే జాతీయ స్థాయిలో అంచనాలు ఏర్పాడ్డాయి. దీనికి తోడు ‘బాహుబలి’ వంటి హిట్‌ చిత్రాల తర్వాత జక్కన్న నుంచి రాబోతున్న చిత్రం కావడంతో అందరి దృష్టీ ఈ ప్రాజెక్టుపైనే ఉంది.



Copyright 2019 USHODAYA ENTERPRISES PVT LTD, ALL RIGHTS RESERVED.
Powered by WinRace Technologies.