మరో నెలరోజుల్లో మళ్లీ పలకరిస్తాడట!!
తమిళ స్టార్‌ హీరో కార్తి ఫుల్‌ జోష్‌తో దూసుకెళ్తున్నాడు. ఈ ఏడాది ఇప్పటికే ‘దేవ్‌’, ‘ఖైదీ’ చిత్రాలతో పలకరించిన ఆయన.. ఇప్పుడు ముచ్చటగా మూడో చిత్రాన్ని ప్రేక్షకుల ముందుకు తీసుకురాబోతున్నాడట. ప్రస్తుతం ఆయన తన వదిన జ్యోతికతో కలిసి ఓ సినిమాలో నటిస్తున్న సంగతి తెలిసిందే. ‘దృశ్యం’ వంటి వైవిధ్యభరిత కథా చిత్రంతో దర్శకుడిగా అందరి దృష్టినీ ఆకర్షించిన జీతు జోసెఫ్‌ దీన్ని తెరకెక్కిస్తున్నారు. ఓ సరికొత్త క్రైమ్‌ థ్రిల్లర్‌ కథతో దీన్ని రూపొందిస్తున్నారట. దీనికి తమిళ్‌లో ‘తంబి’ అనే టైటిల్‌ను ఖరారు చేశారట. ప్రస్తుతం శరవేగంగా చిత్రీకరణ పూర్తి చేసుకుంటోన్న ఈ చిత్రాన్ని క్రిస్మస్‌ కానుకగా బాక్సాఫీస్‌ బరిలో దించాలని చిత్ర బృందం ఆలోచన చేస్తుందట. అంతేకాదు.. డిసెంబరు 20వ తేదీన థియేటర్లలోకి తేవడానికి ముహూర్తం కూడా ఖరారు చేసుకున్నట్లు కోలీవుడ్‌ వర్గాల నుంచి సమాచారం అందుతోంది. ఇదే నిజమైతే కార్తి ఈ క్రిస్మస్‌ పోరులో బాలయ్య ‘రూలర్‌’, సాయిధరమ్‌ తేజ్‌ ‘ప్రతిరోజు పండగే’ చిత్రాలతో పోటీ పడాల్సి ఉంటుంది. అంతేకాదు అదేరోజు సల్మాన్‌ ఖాన్‌ ‘దబాంగ్‌ 3’ కూడా థియేటర్లలోకి రానుంది. అయితే తమిళనాట చూస్తే మాత్రం కార్తికి ఈ తేదీన పెద్దగా పోటీ లేనట్లే తెలుస్తోంది. ఎలాగూ ఆయన తాజాగా ‘ఖైదీ’ వంటి హిట్‌తో జోరు మీదున్నాడు కాబట్టి.. ఇటు తెలుగులోనూ అటు తమిళ్‌లోనూ ఆయన క్రేజ్‌ బాగానే పనిచేసే అవకాశముంది. ఏదైనా దీనిపై పూర్తి క్లారిటీ రావాలంటే చిత్ర బృందం నుంచి అధికారిక ప్రకటన వచ్చే వరకు వేచి చూడక తప్పదు. అన్నట్లు మరో విషయం ఏంటంటే.. ఈ చిత్రంలో కార్తికి జ్యోతిక అక్కగా కనిపించనుందట. సత్యారాజ్, నిఖిల విమల్, అమ్ము అభిరామి తదితరులు కీలక పాత్రలు పోషిస్తున్నారట.



Copyright 2019 USHODAYA ENTERPRISES PVT LTD, ALL RIGHTS RESERVED.
Powered by WinRace Technologies.