‘అల్లుడు శీను’ చిత్రంతో కథానాయకుడుగా టాలీవుడ్‌కి పరిచయం అయ్యాడు బెల్లంకొండ శ్రీనివాస్‌. మాస్‌ కథల్ని ఎంపిక చేసుకుంటూ తనదైన ముద్ర వేసుకున్న శ్రీనివాస్‌ బాలీవుడ్‌లో అడుగుపెడుతున్నారు. ప్రభాస్‌ కథానాయకుడుగా రాజమౌళి దర్శకత్వంలో వచ్చిన ‘ఛత్రపతి’ సినిమా హిందీలో రీమేక్‌ అవుతుంది. ప్రభాస్‌ పాత్రను శ్రీనివాస్‌ పోషిస్తుండగా వి.వి.వినాయక్‌ దర్శకత్వం వహిస్తున్నారు. ఈ విషయాన్ని చిత్రబృందం శుక్రవారం ఉదయం అధికారికంగా ప్రకటించింది. రీమేక్‌లు తెరకెక్కించడంలో వి.వి.వినాయక్‌ ఎంతో నైపుణ్యం కనబరుస్తారని.. ‘ఖైదీ నం150’తో అది మరోసారి నిరూపితమైందని.. ‘ఛత్రపతి’కి ఆయనే కరెక్ట్‌ అని భావించినట్లు చిత్రబృందం వెల్లడించింది. అనంతరం శ్రీనివాస్‌ మాట్లాడుతూ.. ‘బాలీవుడ్‌లోకి ఎంట్రీ ఇచ్చేందుకు ‘ఛత్రపతి’ సరైన ప్రాజెక్ట్ అని నమ్ముతున్నాను. పెన్‌ స్టూడియోస్‌, డాక్టర్‌.జయంతిలాల్‌తో కలిసి పనిచేయడం ఎంతో సంతోషంగా ఉంది. నన్ను కథానాయకుడిగా వెండితెరకు పరిచయం చేసిన వి.వి.వినాయక్‌తో కలిసి పనిచేయడం ఆనందంగా ఉంది. ప్రభాస్‌ పోషించిన పాత్రలో నటించడాన్ని ఓ గొప్ప బాధ్యతగా భావిస్తున్నా’ అని ఆయన వెల్లడించారు.
