రివ్యూ: క‌ల‌ర్ ఫొటో

రివ్యూ: క‌ల‌ర్ ఫొటో

సంస్థ‌: అమృత ప్రొడక్షన్

న‌టీన‌టులు: సుహాస్, చాందిని చౌదరి, సునీల్, వైవా హర్ష తదితరులు

కథ: సాయి రాజేష్ నీలం

క‌ళ‌: క్రాంతి ప్రియం

ఛాయాగ్ర‌హ‌ణం: వెంకట్ ఆర్ శాఖమురి

కూర్పు: కోదాటి పవన్ కళ్యాణ్

పోరాటాలు: ఎ.విజయ్

ర‌చ‌న‌ , ద‌ర్శ‌క‌త్వం : సందీప్ రాజ్

విడుద‌ల‌: 23 అక్టోబ‌ర్ 2020



ద‌స‌రా అన‌గానే బాక్సాఫీసు క‌ళ క‌ళ‌లాడేది. సెల‌వుల్లో అగ్ర క‌థానాయ‌కుల చిత్రాలు పోటాపోటీగా విడుద‌ల‌య్యేవి. కానీ క‌రోనా ఆ వాతావ‌ర‌ణాన్ని పూర్తిగా మార్చేసింది. ఇప్పుడు కొత్త సినిమా కోసం ఓటీటీ వేదిక‌లవైపు చూడాల్సిన ప‌రిస్థితులు త‌లెత్తాయి. `ఆహా` ఓటీటీ వేదిక‌లో ఈ వారం విడుద‌ల‌వుతున్న కొత్త సినిమా... `క‌ల‌ర్ ఫొటో`. హాస్య‌న‌టుడిగా తెలుగు ప్రేక్ష‌కుల‌కు చేరువైన సుహాస్ క‌థానాయ‌కుడిగా ప‌రిచ‌యమ‌వుతూ చేసిన చిత్ర‌మిది. ప్ర‌చార చిత్రాలు ఆస‌క్తిని రేకెత్తించాయి. మ‌రి సినిమా ఎలా ఉందో తెలుసుకుందాం ప‌దండి...


@ క‌థ : 1997వ సంవత్సరం.. మచిలీపట్నం దగ్గర ఓ మూరుమూల గ్రామంలో జరిగే కథ ఇది. ఆ ఊరిలోనే పాలమ్ముకుంటూ కష్టపడి ఇంజినీరింగ్‌ చదువుతుంటాడు జయకృష్ణ (సుహాస్‌). బాగా చదివి మంచి ఉద్యోగం తెచ్చుకొని, తన తండ్రి బాగా చూసుకోవాలనే లక్ష్యంతో జీవిస్తుంటాడు. ఓరోజు కాలేజీలో కల్చరల్‌ రిహార్సల్స్‌లో అమ్మవారి వేషంలో ఉన్న దీప్తి వర్మ (చాందినీ చౌదరి)ను చూసి తొలి చూపులోనే మనసు పారేసుకుంటాడు కృష్ణ. కానీ, అంత అందమైన అమ్మాయి తన లాంటి నల్లగున్న అబ్బాయిని ప్రేమిస్తుందో లేదో అన్న భయంతో.. తన ప్రేమను మనసులోనే దాచుకుంటాడు. ఆమెను దూరం నుంచి చూస్తూనే ఆరాధిస్తుంటాడు. కానీ, కృష్ణ వ్యక్తిత్వం, ప్రవర్తన నచ్చి తనను ప్రేమిస్తున్నట్లు చెబుతుంది దీప్తి. కానీ, ఆమె అన్నయ్య ఇన్స్‌పెక్టర్‌ రామరాజు (సునీల్‌)కు అసలు ప్రేమ అంటేనే గిట్టదు. తన చెల్లికి మంచి అందగాన్ని చూసి పెళ్లి చెయ్యాలనుకుంటుంటాడు. అతనికి తన చెల్లి కృష్ణతో ప్రేమలో ఉన్నట్లు తెలుస్తుంది. అస్సలు నలుపంటేనే గిట్టని రామరాజు.. అదే కారణంతో వాళ్ల ప్రేమకు అడ్డుచెబుతాడు. కృష్ణకు తెలియకుండా దీప్తిని విజయవాడ పంపించి.. అతనిపై దాడి చేస్తాడు. మరి తర్వాత కృష్ణకు ఏమైంది? కృష్ణ, దీప్తి ఎలా ఒక్కటయ్యారు? అన్నది మిగతా కథ.




* ఎలా ఉందంటే..

పేద ధనిక, కులాంతర, మతాంతర.. ఇలా తెలుగు ప్రేక్షకులు వెండితెరపై రకరకాల ప్రేమకథలు చూశారు. కానీ, వర్ణ వివక్షతను ఇతివృత్తంగా చేసుకోని అల్లుకున్న ప్రేమకథలు ఇంత వరకు పెద్దగా రాలేదనే చెప్పొచ్చు. దర్శకుడు సందీప్‌ రాజ్‌ తొలి ప్రయత్నంలోనే ఇలాంటి విభిన్నమైన కథాంశాన్ని భుజానికెత్తుకోవడం మెచ్చుకోవాల్సిన అంశం. దీనికి తగ్గట్లుగానే 1997 నేపథ్యాన్ని తీసుకోని కథకు పీరియాడికల్‌ టచ్‌ ఇవ్వడం.. హాస్య నటుడు సుహాస్‌ను హీరోగా, సునీల్‌ను ప్రతినాయకుడిగా పరిచయం చేస్తూ సినిమాను రూపొందించడం వంటి మెరుపులతో అందరి దృష్టి సినిమా వైపు పడేలా చేశారు. ఈ కథ గురించి చెప్పాలంటే.. ‘ప్రేమించిన వాళ్లను అందనంత ఎత్తులో నుంచో బెట్టడమే నిజమైన ప్రేమ’ అన్న లైన్‌తో ఈ కథ రాసుకొన్నాడు. దీనికే నలుపు - ఎరుపు రంగులను జోడించి, ప్రేమకు కులం, మతమే కాదు.. వర్ణం కూడా అడ్డుగోడగా నిలువద్దని చెప్పే ప్రయత్నం చేశారు. కానీ, సందీప్‌ కథ ఎత్తుకున్న తీరు నుంచి దాన్ని ముగించిన విధానం వరకు ఆద్యంతం తడబాటు కనిపించింది. నిజానికి షార్ట్‌ ఫిల్మ్‌ బ్యాగ్రౌండ్‌తో తెరపై మెరిసిన దర్శకుల్లో ఒక షార్ప్‌నెస్‌ కనిపిస్తుంది. సూటిగా సుత్తిలేకుండా కథ చెప్తుంటారు. కానీ, ఈ చిత్ర విషయంలో అది లోపించినట్లు కనిపిస్తుంది. ప్రధమార్థమంతా హీరో తన రంగు, ప్రేమ గురించే తప్ప మరే ధ్యాస లేదు. విరామానికి కానీ, అసలు కథ మొదలు కాదు. ప్రధమార్థమంతా కాలేజీలో సీనియర్లతో గొడవలు, తన ప్రేమను ఎలా ముందుకు తీసుకెళ్లాలా అని సుహాస్‌ పడే తాపత్రయమే కనిపిస్తుంది. ద్వితియార్థంలో హీరోహీరోయిన్ల ప్రేమ పట్టాలెక్కడం.. ఓ రెండు పాటలు.. అంతలోనే ఆ ప్రేమకు కథానాయిక అన్న అడ్డు చెప్పడం, బెదిరింపులు, దాడులతో షరా మామూలే అయిపోయింది. దీంతో కథలో కొత్తదనమున్నా.. చివరకు ఒక రొటీన్‌ చిత్రం చూశామన్న భావన ప్రేక్షకుల్లో కలుగుతుంది.






* ఎవరెలా చేశారంటే..

సుహాస్‌కు హీరోగా తొలి చిత్రమైనా.. నటుడిగా తనకున్న అనుభవంతో జయకృష్ణ పాత్రకు నూటికి నూరు శాతం న్యాయం చేశాడు. తెరపై ఎక్కడా అతి చేసినట్లుగా కనిపించదు. చాందినీ చౌదరి.. దీప్తి పాత్రలో ఒదిగిపోయింది. సుహాస్‌ - చాందినీల మధ్య నడిచే లవ్‌ ట్రాక్‌ అక్కడక్కడా ఆకట్టుకుంటుంది. కానీ, దాన్ని భావోద్వేగభరితంగా తీర్చిదిద్దడంలో దర్శకుడు తడబడ్డాడు. నిజానికి ఇలాంటి కథలో భావోద్వేగాలు పండించడానికి మంచి ఆస్కారమున్నా దర్శకుడు దాన్ని సరైన విధంగా తీర్చిదిద్దుకోలేదనిపిస్తుంది. రామరాజు పాత్రల నటించిన సునీల్‌.. ప్రతినాయకుడిగా కనిపించేందుకు చాలా కష్టపడ్డాడు. కానీ, ప్రేక్షకుల్లో మాత్రం తెరపై ఓ భీకరమైన విలన్‌ను చూస్తున్నామన్న ఫీల్‌ ఎక్కడా కలగదు. సుహాస్, వైవా హర్షల మధ్య వచ్చే కామెడీ ట్రాక్స్‌ అక్కడక్కడా నవ్విస్తాయి. కాలభైరవ అందించిన పాటలు, నేపథ్య సంగీతం సినిమాకు ప్రధాన ఆకర్షణగా నిలుస్తుంది. నిర్మాణ విలువలు ఫర్వాలేదనిపించాయి.



బలాలు

+ ఎంచుకున్న కథ

+ సుహాస్, చాందినీ నటన

+ సంగీతం

బలహీనతలు

- కథను నడిపించిన విధానం

- ముగింపు

 
* చివరగా..

కలర్‌ఫొటో.. అక్కడక్కడా మెప్పించే ప్రేమకథ



Copyright 2020 USHODAYA ENTERPRISES PVT LTD, ALL RIGHTS RESERVED.
Powered by WinRace Technologies.