భలే బాతు

డొనాల్డ్‌ డక్‌ పేరు వినని వారెవరూ ఉండరు. కార్టూన్‌ పాత్రగా ప్రపంచవ్యాప్తంగా పిల్లల్ని, పెద్దల్ని ఆకట్టుకున్న ఈ బాతు పాత్ర తొలిసారిగా 1934లో ఇదే రోజు ‘ద వైజ్‌ లిటిల్‌ హెన్‌’ చిత్రం ద్వారా వెండితెరపై వెలుగులీనింది. వాల్ట్‌డిస్నీ ప్రొడక్షన్స్‌ సంస్థ దొనాల్డ్‌ డక్‌ను సృష్టించింది. అతి తెలివితో, తెంపరితనంగా మాట్లాడుతూ ఆకట్టుకునే ఈ కొంటె బాతు పాత్ర, డిస్నీ వాళ్లే సృష్టించిన ‘మిక్కీ మౌస్‌’తో సమానంగా ప్రపంచాన్ని ఆకర్షించింది. యాభై మేటి కార్టూన్‌ పాత్రల్లో ఒకటిగా నిలిచింది. రెండు దశాబ్దాల్లో దాదాపు 150 సినిమాల్లో నవ్వించి అలరించింది. ఆస్కార్‌ అవార్డుల వేడుకల్లో ఎన్నోసార్లు గుర్తింపు పొందింది. ఆస్ట్రేలియాకు చెందిన క్రికెట్‌ క్రీడాకారుడు డొనాల్డ్‌ బ్రాడ్‌మన్‌ అమెరికా పర్యటనలో ఆడుతూ డక్‌ అవుట్‌ అవడాన్ని గమనించిన వాల్ట్‌డిస్నీ తన కార్టూన్‌ పాత్రకు ఇలా పేరు పెట్టాడని చెబుతారు.



Copyright 2019 USHODAYA ENTERPRISES PVT LTD, ALL RIGHTS RESERVED.
Powered by WinRace Technologies.