ప్రియుడితో దుబాయ్‌ వెళ్లిన సాయిపల్లవి

రౌడీ పిల్ల సాయిపల్లవి తన ప్రియుడితో కలిసి దుబాయ్‌ వెళ్లింది. ఈరోజు నుంచి మరికొన్ని రోజుల పాటు ఆమె అక్కడే తన ప్రియుడితో కలిసి చక్కర్లు కొట్టబోతుంది. ఇంతకీ ఆమె ప్రేమించిన ఆ కుర్రాడు మరెవరో కాదు అక్కినేని నాగచైతన్య. ప్రస్తుతం వీళ్లిద్దరు ప్రేమికులుగా నటిస్తోన్న ‘లవ్‌స్టోరీ’ చిత్రం కోసమే ఈ ప్రేమ యాత్ర. ‘ఫిదా’ వంటి హిట్‌ తర్వాత దర్శకుడు శేఖర్‌ కమ్ముల నుంచి వస్తోన్న కొత్త చిత్రమిది. ఇందులో చైతూ తెలంగాణ ప్రాంతానికి చెందిన దళిత కుర్రాడిగా దర్శనమివ్వబోతున్నారు. సాయిపల్లవి ఓ అగ్రవర్ణానికి చెందిన ధనిక యువతిగా కనిపించనుంది. వీళ్లిద్దరి మధ్య నడిచే ప్రేమకథతో ఈ సినిమాను రూపొందిస్తున్నారు. ప్రస్తుతం ఈ చిత్ర కొత్త షెడ్యూల్‌ దుబాయ్‌లో ప్రారంభమైంది. మరికొన్ని రోజుల పాటు చైతూ - సాయిపల్లవిలతో పాటు ఇతర నటీనటులపై కీలక సన్నివేశాలను ఓ పాటను చిత్రీకరించబోతున్నట్లు సమాచారం. దీన్ని వేసవి కానుకగా ప్రేక్షకుల ముందుకు తీసుకొచ్చేందుకు చిత్ర బృందం సన్నాహాలు చేస్తోంది.


Copyright 2020 USHODAYA ENTERPRISES PVT LTD, ALL RIGHTS RESERVED.
Powered by WinRace Technologies.