ఓ దశలో డబ్బింగ్‌ చెప్పలేక వెళ్లిపోయా: వెంకీ

‘‘జీనీ పాత్రకు డబ్బింగ్‌ చెప్పలేక.. ఓ క్షణంలో స్టూడియో నుంచి బయటకు వెళ్లిపోయా’’ అన్నారు విక్టరీ వెంకటేష్‌. విల్‌స్మిత్, మీనా మసూద్, నోయిమీ స్కాట్‌ ప్రధాన పాత్రల్లో నటించిన తాజా హాలీవుడ్‌ చిత్రం ‘అల్లాదిన్‌’. 1992లో వచ్చిన ‘అల్లాదిన్‌’ యానిమేషన్‌ చిత్రానికి లైవ్‌ యాక్షన్‌ రూపంగా డిస్నీ సంస్థ దీన్ని రూపొందించింది. దీనికి గై రిజి దర్శకత్వం వహించారు. ఈ సినిమా తెలుగు వెర్షన్‌ కోసం జీనీ పాత్రకు వెంకటేష్, అల్లాదీన్‌ పాత్రకు వరుణ్ తేజ్‌ గాత్రం అందించిన సంగతి తెలిసిందే. ఈ చిత్రం మే 24న ప్రేక్షకుల ముందుకొస్తున్న నేపథ్యంలో చిత్ర బృందం తాజాగా వెంకీ, వరుణ్లతో హైదరాబాద్‌లో విలేకర్ల సమావేశం ఏర్పాటు చేసింది. ఈ సందర్భంగా వెంకటేష్‌ మాట్లాడుతూ ‘‘ఈ సినిమాలో జీనీ పాత్రలో విల్‌స్మిత్‌ నటన ప్రతిఒక్కరినీ ఆకట్టుకుంటుంది. ఆయన పాత్రకు డబ్బింగ్‌ చెప్పడం నాకు చాలా కష్టంగా అనిపించింది. ఓ దశలో డబ్బింగ్‌ చెప్పలేక లేచి స్టూడియో బయటకు వెళ్లిపోయా. కానీ, తర్వాత దాన్ని ఛాలెంజింగ్‌ తీసుకొని పూర్తి చేశా’’ అన్నారు. వరుణ్‌ మాట్లాడుతూ ‘‘చిన్నప్పుడు నేనెంతగానో ఇష్టపడిన పాత్రకు ఇప్పుడిలా డబ్బింగ్‌ చెప్పడం ఆనందాన్నిచ్చింద’’న్నారు.

ఈ కార్యక్రమంలో మీడియా అడిగిన మరిన్ని ప్రశ్నలకు వెంకీ, వరుణ్‌ సమాధానాలిచ్చారిలా.

డిస్నీతో మీ అనుబంధం ఎలాంటింది?
వెంకటేష్‌:  అందరిలాగానే నేను కూడా మా పిల్లలతో కలిసి డిస్నీ మూవీలను చూస్తూ చాలా ఎంజాయ్‌ చేసేవాడిని. ఇప్పుడు డిస్నీ వాళ్లు అలాద్దీన్‌లో జీనీ పాత్రకు డబ్బింగ్‌ చెప్పమని పిలిచినప్పుడు చాలా సంతోషం అనిపించింది. అద్భుతమైన లైవ్‌ యాక్షన్‌ డ్రామా తెలుగు ప్రేక్షకులకు చేరితే బాగుంటుందనిపించింది. ఈ సినిమాను తెలుగు ప్రేక్షకులు అందరూ చూడాలనే ఉద్దేశంతోనే డిస్నీ వాళ్లు అడగగానే నేనూ ఒప్పుకొన్నా. 

మీకు జీనీ ఎదురైతే ఎలాంటి కోరికలు కోరతారు?
వెంకటేష్‌: అవన్నీ మీకెందుకు చెబుతానండీ(నవ్వులు). అందరికీ కోరికలు ఉంటాయి. అందరి కోరికలు తీరుస్తుంటే ఆ ఆనందమే వేరు. ఈ సినిమాలో నేను వరుణ్‌ అడిగే కోరికలు నెరవేరుస్తుంటా. 

మీ వాయిస్‌లో ‘అలాద్దీన్‌’ పాత్ర పోషించడం ఎలా ఉంది?
వరుణ్‌తేజ్‌: నా చిన్నప్పుడు అలాద్దీన్‌ సినిమా చూశా. అంతేకాదు, గేమ్‌ కూడా ఉండేది. నేను, మా చెల్లి ఆడుకునేవాళ్లం. నా చిన్నప్పుడు తీపి గుర్తులను మిగిల్చిన ఈ సినిమాలో నా వాయిస్‌ను ఇవ్వడం నా అదృష్టం. డబ్బింగ్‌ చెబుతూ, మీ అందరికంటే ముందు నేను ఈ సినిమా చూశా. చాలా బాగుంది. ఇదో చక్కని అనుభవం.

జీనీ పాత్రకు డబ్బింగ్‌ చెబుతూ మీరు ఎలా ఎంజాయ్‌ చేశారు?
వెంకటేష్‌: జీనీ పాత్రకు డబ్బింగ్‌ చెప్పడం అద్భుతమైన అనుభూతి. ఆ ఆకారం కూడా చాలా ఫన్నీగా ఉంటుంది. పైగా అతను అలాద్దీన్‌కు మెంటార్‌. నాకు సరిగ్గా సరిపోయే పాత్ర అది. మొదటిసారి మరో పాత్రకు నా వాయిస్‌ ఇచ్చా. నాకు కష్టంగానే అనిపించింది. ఎందుకంటే ఆ పాత్రలో మేజిక్‌ ఉంటుంది.. ఫన్‌ ఉంటుంది. విల్‌స్మిత్‌ బాడీ లాంగ్వేజ్‌ ప్రత్యేకంగా ఉంటుంది. చాలా వేగంగా ఉంటారాయన. ఆ పాత్రకు తగినట్లుగా డబ్బింగ్‌ చెప్పడానికి కొంత సమయం పట్టింది. అయితే, తెలుగు ఆడియన్స్‌ బాగా ఎంజాయ్‌ చేస్తారు. నాకు కామెడీ చేయటం ఇష్టమన్నది మీకు తెలిసిందే. 


మీరు కాకుండా మరెవరూ ఆ పాత్రకు డబ్బింగ్‌ చెప్పటానికి సరిపోరేమో..
వెంకటేష్‌: (నవ్వులు) అంత చెప్పొద్దలెండీ! ఎందుకంటే ఆ పాత్రలోనే థ్రిల్‌ ఉంది. డబ్బింగ్‌ ఎవరు చెప్పినా, అందులో లీనమై చెబుతారు. నేను కూడా అలాగే చెప్పా. ‘ఎఫ్‌2’లో వరుణ్‌కు ఒక గైడ్‌లా ఉన్నా, ఇందులో కూడా మేజికల్‌గా అతనికి గైడ్‌ చేస్తుంటా.(మధ్యలో వరుణ్‌ కలగజేసుకుని) ‘ఎఫ్‌2’లో తప్పుదోవ పట్టించారు. ఇందులో సరైన దారిలో తీసుకెళ్లారు(నవ్వులు)

‘అలాద్దీన్‌’కు దీపం దొరికినట్లు మీకు దొరికితే ఏం చేస్తారు?
వరుణ్‌తేజ్‌: చాలా కష్టమైన ప్రశ్న. ఆలోచించుకుని చెప్పాలి. నేను జీవితంలో ఎప్పుడూ సంతోషంగా ఉండాలని కోరుకుంటా.

ఇంగ్లీష్ సినిమాలు తెలుగులో డబ్‌ అయితే, ఆ భాష కొత్తగా ఉంటుంది కదా! మీకెలా అనిపించింది?
వెంకటేష్‌: నాకూ కొత్తగా, తమాషా, కష్టంగా అనిపించింది. నేను అమెరికాలో చదువుకున్నప్పుడు అక్కడి ఇంగ్లీష్‌ భాషా శైలిని ఎంజాయ్‌ చేస్తాను. ఇప్పుడు కూడా అంతే. అయితే, జీనీ పాత్ర చాలా పవర్‌ఫుల్‌, హ్యూమర్‌ కూడా ఉంటుంది. విల్‌స్మిత్‌ చేసిన పాత్రకు డబ్బింగ్‌ చెప్పడం సంతోషంగా ఉంది. 

‘ఎఫ్‌2’ జర్నీ అలాద్దీన్‌కు ఏమైనా ఉపయోగపడిందా?
వెంకటేష్‌: ఏ సినిమా ప్రత్యేకత దానిదే. మేమిద్దరం మళ్లీ కలిసి పనిచేయడం యాదృచ్చికమే. ఎఫ్‌2లో మొదట ఏడిపించినా, ఆ తర్వాత వరుణ్‌ను గైడ్‌ చేస్తూ ఉంటా. ఇందులో కూడా అంతే. 



చిన్న ట్రైలర్‌లోనే మీ వాయిస్‌లో చాలా వైవిధ్యాన్ని చూపించారు? ఎలా సాధ్యమైంది?
వెంకటేష్‌: నిజంగా ఇదో ఛాలెంజ్‌లాగానే అనిపించింది. తొలిరోజు చాలా కంగారు పడ్డా. ఎందుకంటే ఇది కొత్త అంశం. ఒకనొక సందర్భంలో లేచి వెళ్లిపోయాను కూడా. ఇంటికి వెళ్లి, ‘ఇదేంటిరా! జీనీ పాత్రలో ఇరుక్కుపోయానా’ అనిపించింది. అయితే, ఒక్కసారి ఆ పాత్రలోకి పరకాయ ప్రవేశం చేసిన తర్వాత చేసుకుంటూ వెళ్లిపోయా.

మీకు స్క్రిప్ట్‌ ఇచ్చినప్పుడు మీరు ఎన్నిసార్లు అద్ధం ముందు నిలబడి ప్రాక్టీస్‌ చేశారు?
వెంకటేష్‌: నిజ జీవితంలో నేనూ జీనీలాంటి వ్యక్తినే. ఇంట్లో నా పిల్లలతో చాలా సరదాగా ఉంటా. వాళ్లకు అడిగింది ఇచ్చే వాడిని. వాయిస్‌లో వైవిధ్యం చూపించడానికి కొంచెం హోంవర్క్‌ చేసిన మాట నిజమే! అప్పుడే ప్రేక్షకులు ఆదరిస్తారు.

మీరు జీనీ అయితే, వరాలు ఇవ్వడానికి ఎవరి దగ్గరకు వెళ్తారు?
వెంకటేష్‌: అందరి దగ్గరకీ వెళ్తా(నవ్వులు)

‘అలాద్దీన్‌’ పాత్రకు డబ్బింగ్‌ చెప్పడానికి మీరెలా సిద్ధం అయ్యారు?
వరుణ్‌తేజ్‌: నేను చేసిన సినిమాలు కూడా డబ్బింగ్‌ సమయానికి వచ్చేసరికి చాలా కష్టం అనిపిస్తుంది. ఈ సినిమా విషయంలో అది ఇంకాస్త ఎక్కువగా ఉంది. ఎందుకంటే ఇందులో మేము నటించలేదు. వేరే వాళ్లు నటిస్తే, వాళ్లకు మేము డబ్బింగ్‌ చెప్పాం. 

మీ గడ్డం వెనుక కథ ఏంటి?
వరుణ్‌తేజ్‌: కొత్త సినిమా కోసం..



Copyright 2019 USHODAYA ENTERPRISES PVT LTD, ALL RIGHTS RESERVED.
Powered by WinRace Technologies.