కమనీయం.. శ్రీమణి కల్యాణం

పాటల రచయిత శ్రీమణి ఓ ఇంటివాడయ్యారు. ఫరాని వివాహమాడి కొత్త జీవితాన్ని ప్రారంభించారు. నవంబరు 22న కొద్దిమంది అతిథుల సమక్షంలో వైభవంగా ఈ వేడుక జరిగింది. పదేళ్ల నుంచి ప్రేమలో ఉన్న ఈ ఇద్దరు కుటుంబ సభ్యుల అనుమతితో ఒక్కటయ్యారు. ఈ ఆనందాన్ని సామాజిక మాధ్యమాల వేదికగా పంచుకున్నారు శ్రీమణి. ‘ఈ మధుర క్షణం కోసం పదేళ్లుగా ఎదురుచూస్తున్నాం. ఆ (కల నెరవేరింది)సమయం వచ్చింది. మా మనసుల్ని అర్థం చేసుకున్న భగవంతుడికి, తల్లిదండ్రులకు ధన్యవాదాలు. వివాహ జీవితం ఆరంభం’ అంటూ పెళ్లి ఫొటోలు పంచుకున్నారు. చూడ ముచ్చటైన ఈ జంటను చూసి పలువురు సినీ ప్రముఖులు, అభిమానులు శుభాకాంక్షలు తెలియజేస్తున్నారు. ‘100%లవ్‌’ చిత్రంతో గేయ రచయితగా పరిచయమయ్యారు శ్రీమణి. అన్ని రకాల పాటలు రాస్తూ తనకంటూ ప్రత్యేక గుర్తింపు తెచ్చుకున్నారు. ప్రస్తుతం ప్రతిచోట వినిపిస్తున్న ‘నీ కన్ను నీలి సముద్రం’ ఈయన కలం నుంచి జాలువారిందే.



Copyright 2020 USHODAYA ENTERPRISES PVT LTD, ALL RIGHTS RESERVED.
Powered by WinRace Technologies.