కార్తికేయ ‘చల్లగా’.. రవితేజ వేడిగా

‘చావు కబురు చల్లగా’ వినిపించేందుకు సిద్ధమయ్యాడు యువ కథానాయకుడు కార్తికేయ. ప్రముఖ నిర్మాత అల్లు అరవింద్‌ సమర్పణలో బన్నీవాసు నిర్మిస్తున్నారు. కౌశిక్‌ పెగళ్లపాటి దర్శకుడు. ప్రస్తుతం చిత్రీకరణ ప్రారంభమైంది. బస్తీ బాలరాజు పాత్రలో కనిపిస్తాడు కార్తికేయ. దీనికి సంబంధించిన ఫస్ట్‌లుక్ విడుదల చేసింది చిత్ర బృందం. ట్రాఫిక్‌ జామ్‌లో చిక్కుకున్న ఓ వాహనంపై నిల్చుని సిగరెట్‌ తాగుతూ దర్శనమిచ్చాడు. గళ్ల చొక్కా, లుంగీ ధరించి బస్తీ కుర్రాడి లుక్‌లో ఒదిగిపోయాడు. ట్రాఫిక్‌ జామ్‌లో కూడా ఇలా కూల్‌గా ఉన్న కార్తికేయ అందరి దృష్టిని ఆకర్షిస్తున్నాడు. మరోవైపు మాస్‌ మహారాజ్‌ రవితేజ ‘క్రాక్‌’ చూపించేందుకు సన్నాహాలు మొదలుపెట్టాడు. గోపీచంద్‌ మలినేని దర్శకత్వంలో తెరకెక్కుతున్న చిత్రమిది. వాస్తవ సంఘటనల ఆధారంగా రూపొందుతుంది. పోలీసు అధికారి పాత్ర పోషిస్తున్నాడు రవితేజ. తాజాగా ఓ పోస్టర్‌ విడుదల చేసింది చిత్రబృందం. ఇందులో రవితేజ తుపాకి పట్టుకుని పరుగెత్తుతూ దర్శనమిచ్చాడు. ఆయన ముఖం కనిపించకపోయినా ఆ కటౌట్‌కే అభిమానులు ఫిదా అవుతున్నారు. పవర్‌ఫుల్‌ లుక్‌లో వేడి పుట్టిస్తున్నాడు. మే 8న ప్రేక్షకుల ముందుకు రానున్న ఈ చిత్ర టీజర్‌ త్వరలోనే విడుదల చేయనున్నారు. బి.మధు నిర్మిస్తున్న ఈ చిత్రంలో శృతి హాసన్‌ కథానాయిక.



Copyright 2020 USHODAYA ENTERPRISES PVT LTD, ALL RIGHTS RESERVED.
Powered by WinRace Technologies.