ఈ సీరియల్స్‌ నా బాల్యాన్ని గుర్తు చేశాయి..

కరోనా కారణంగా ఏర్పడ్డ లాక్‌డౌన్‌ పరిస్థితులతో చిత్రీకరణలు లేక ఇంటికే పరిమితమయ్యారు సినీతారలంతా. ఇప్పుడీ అనుకోని విరామ సమయన్ని తారలంతా ఒక్కొక్కరూ ఒక్కో తరహాలో సద్వినియోగం చేసుకుంటున్నారు. అందాల చందమామ కాజల్‌ మాత్రం దూరదర్శన్‌లో ‘రామాయణ’, ‘మహాభారతం’ ధారావాహికలను చూస్తూ తన చిన్ననాటి జ్ఞాపకాలను నెమరువేసుకుంటోంది. తాజాగా ట్విటర్‌ వేదికగా ఈ విషయాన్ని అభిమానులతో పంచుకుంది. దేశంలో ఏర్పడ్డ లాక్‌డౌన్‌ పరిస్థితుల వల్ల ప్రజలంతా ఇళ్లకే పరిమితమయ్యారు. ఈ నేపథ్యంలోనే ప్రజల్లో ఉత్సాహం నింపేందుకు వాళ్ల కోరిక మేరకు కేంద్ర ప్రభుత్వం దూరదర్శన్‌ ఛానెల్స్‌లో 30ఏళ్ల నాటి విజయవంతమైన ‘రామాయణం’, ‘మహాభారతం’ సీరియళ్లను ప్రసారం చేయాలని నిర్ణయించుకుంది. ఇప్పుడీ క్రమంలోనే కాజల్‌ కూడా తన ఇంట్లో కూర్చోని ‘రామాయణం’ చూస్తూ ట్విటర్‌లో ఓ పోస్ట్‌ పెట్టింది. ‘‘దూరదర్శన్‌లో నాకెంతో ఇష్టమైన రామాయణం సీరియల్‌ను నా కుటుంబంతో కలిసి చూస్తున్నా. ఒకప్పుడు మా వారాంతమంతా ఈ ధారావాహికతోనే గడిచిపోయేది. ఇప్పుడిన్నేళ్ల తర్వాత ‘రామాయణం’, ‘మహాభారతం’లు మళ్లీ ప్రసారం చేస్తున్నందుకు చాలా ఆనందంగా ఉంది. ఇవి నాకు నా చిన్ననాటి రోజుల్ని మళ్లీ గుర్తుచేశాయి. ఈ తరం పిల్లలకు మన పురాణాల గొప్పతనాన్ని తెలియజేయడానికి ఇదొక గొప్ప వేదిక అవుతుంది’’ అని తన ట్వీట్‌లో రాసుకొచ్చింది కాజల్‌. ప్రస్తుతం ఈ భామ చిరంజీవి సరసన ‘ఆచార్య’ చిత్రంలో నటించబోతుంది. దీంతో పాటు ‘మోసగాళ్లు’, ‘భారతీయుడు2’, ‘ఇండియన్‌ సాగా’ తదితర చిత్రాల్లో నటిస్తోంది.



Copyright 2020 USHODAYA ENTERPRISES PVT LTD, ALL RIGHTS RESERVED.
Powered by WinRace Technologies.