నేనెప్పుడు పెళ్లి చేసుకుంటానా?అని ఎదురు చూస్తున్నారు.

అచ్చ తెలుగు అందం... రీతూవర్మ. ఆధునిక ఆలోచనలున్న అమ్మాయికి ప్రతిరూపంలా కనిపిస్తూ పాత్రల్ని రక్తి కట్టిస్తోంది. అందమే కాదు, సహజమైన నటనా ఆమె సొంతం. ‘పెళ్లిచూపులు’ చిత్రంతో అమ్మాయంటే ఇలా ఉండాలనేలా ఆ పాత్రలో ఒదిగిపోయింది. ఇటీవల విడుదలైన ‘కనులు కనులు దోచాయంటే’తో మరో విజయాన్ని అందుకుంది. నాని, శర్వానంద్, నాగశౌర్యలతో కలిసి నటిస్తోంది. ప్రస్తుతం ఇంట్లో గడుపుతున్న రీతూతో (ఈనాడు) సితారతో  ప్రత్యేకంగా ముచ్చటించింది. ఆమె చెప్పిన విషయాలివీ...

సెట్స్‌ని మిస్‌ అవుతున్నారా?
మూడు నెలలయ్యింది, మిస్‌ అవ్వకుండా ఎలా ఉంటాం. ఎప్పుడెప్పుడు సెట్‌కి వెళదామా? అనిపిస్తోంది. మన చేతుల్లో ఏమీ లేదు కదా. చివరిగా ‘టక్‌ జగదీష్‌’ సినిమా చిత్రీకరణలో పాల్గొన్నా. ఆహ్లాదరకమైన వాతావరణం మధ్య చిత్రీకరణ జరిగింది. అక్కడ షూటింగ్‌ జరుగుతున్నప్పుడే మాకు కరోనా గురించి రోజుకో సమాచారం అందింది. దాంతో చిత్రీకరణని పూర్తి చేసుకుని హైదరాబాద్‌కి వచ్చాం. రాగానే లాక్‌డౌన్‌ని ప్రకటించారు. మొదట్లో అంతగా ఏమీ అనిపించలేదు కానీ... కొన్ని రోజుల తర్వాత ఏంటి పరిస్థితి? ఎప్పుడు బయటికెళతాం? అనిపించింది.

నాలుగు సినిమాల్లో నటిస్తున్నారు కదా. చిత్రీకరణకి సిద్ధం కావాలని ఎవరి దగ్గర్నుంచైనా కబురొచ్చిందా?
నేనూ ఎదురు చూస్తున్నా కానీ, ఎవరి నుంచీ పిలుపు రాలేదు. చిత్రీకరణలకి అనుమతులొచ్చినా... ఇంకొంచెం సమయం తీసుకోవడం మేలని భావిస్తున్నారంతా. అది అవసరం కూడా. ఒకొక్క సెట్‌లో వంద నుంచి రెండు వందల మంది ఉంటాం. అందరూ సురక్షితంగా ఉండటం ముఖ్యం కదా.

ఏయే పుస్తకాలు చదివారు? ఏ సినిమాలు చూశారు?
ఓటీటీల్లో చాలా సిరీస్‌లు చూశా. ఇక సినిమాల విషయానికొస్తే మలయాళం, ఆంగ్ల చిత్రాలు ఎక్కువగా చూశా. ఈమధ్య చూసిన సినిమాల్లో నాకు బాగా నచ్చింది ‘జో జో రాబిట్‌’. హిట్లర్‌ కాలం నేపథ్యంలో సాగే చిత్రమది. కొన్ని ఆటో బయోగ్రఫీలు చదివా. ‘ది ఫైవ్‌ పీపుల్‌ యు మీట్‌ ఇన్‌ హెవెన్‌’, ‘వన్‌ డే’ పుస్తకాలు చదివా.

మరి ఈ మూడు నెలలు ఏమేం చేశారు?
ఒకొక్క రోజు ఒక్కోలా గడుస్తోంది. అది చేద్దాం, ఇది చేసేద్దామనే ఉత్సాహం ఒక రోజు ఉంటుంది. ఒకొక్క రోజు ఏదీ చేయలేం. అయినా సరే, ఈ సమయాన్ని ఎందుకు వృథా చేయడం అని పాత హాబీలు మళ్లీ మొదలుపెట్టా. పాఠశాల, కళాశాల రోజుల్లో పెయింటింగ్స్‌ అంటే పిచ్చి. ఆ హాబీని ఇప్పుడు మళ్లీ ప్రారంభించా. నాకు ఆహారం అంటే చాలా ఇష్టం. వంటింట్లోకి దూరి కొత్త కొత్త ప్రయోగాలు చేస్తున్నా. ఇతరత్రా ఇంటి పనుల్లో మా అమ్మానాన్నలకి సాయం చేస్తున్నా.

కొంతకాలం పాటు తమిళంలో ఎక్కువగా సినిమాలు చేశారు. కారణమేమిటి?
రెండు సినిమాలే చేశా. ‘పెళ్ళిచూపులు’ తర్వాత తెలుగులో ఆసక్తికరమైన కథలేవీ దొరకలేదు. అదే సమయంలో తమిళం నుంచి అవకాశాలు వచ్చాయి. కావాలని తమిళంలోకి వెళ్లలేదు. తెలుగుకే నా తొలి ప్రాధాన్యం. నా కెరీర్‌ ప్రారంభమైందే ఇక్కడ. ఫలానా భాషలోనే నటించాలి, ఫలానా పాత్రలే చేయాలనే ఆలోచన ఎప్పుడూ లేదు. ప్రస్తుతం తెలుగులో నాలుగు సినిమాలు చేస్తున్నా. అందులో శర్వానంద్‌తో చేస్తున్నది ద్విభాషా చిత్రం.

పెళ్లి ఎప్పుడు చేసుకుంటావని ఇంట్లో అడుగుతున్నారా?
సీరియస్‌ చర్చలేమీ జరగవు. అమ్మానాన్నలు నేనెప్పుడు పెళ్లి చేసుకుంటానా? అని ఎదురు చూస్తున్నారు. దానికి చాలా సమయం ఉందని చెబుతుంటా. పెళ్లికి నేను సిద్ధంగా ఉన్నప్పుడు, సరైన వ్యక్తి దొరికాడు అనిపిస్తే కచ్చితంగా చేసుకుంటా. ప్రేమ పెళ్లే చేసుకుంటా.

భిన్నమైన పాత్రల్లో కనిపిస్తుంటారు సరే, వ్యక్తిగతంగా మీరెలా ఉంటారు?

సృజనాత్మకమైన ఆలోచనలున్న వ్యక్తిని నేను. కళారూపాల్ని ఎక్కువగా ఇష్టపడతా. ఊహలంటే ఇష్టం. పగటి కలలు ఎక్కువగా కంటుంటా. ఏదైనా చేయాలనిపించినా, లేక ఏదైనా కావాలి అనిపించినా దాని గురించి పదే పదే ఆలోచిస్తూ కలలు కంటూ ఉంటా. సగటు అమ్మాయిల్లాగే ఫన్‌ని ఇష్టపడతా. ప్రతి దానికీ టెన్షన్‌ పడే రకం కాదు. భవిష్యత్తు గురించి ఎక్కువగా ఆలోచించను, ఎన్ని కలలు కన్నా వాస్తవంలో బతుకుతుంటా.

పీరియాడికల్‌...
సినిమాలంటే చాలా ఇష్టం. 1950, 60 కాలం, ఆ నేపథ్యం నాకు బాగా నచ్చుతుంది. అలాంటి కథలో నటించే అవకాశం దొరికితే ఎంత బాగుండేదో అనిపిస్తుంటుంది. యాక్షన్‌ పాత్రలూ చేయాలని ఉంది. చాలా ఫిట్‌గా ఉండే అమ్మాయిని నేను. కామెడీ అన్నా ఇష్టం, ఆ తరహా కథల్ని కూడా ప్రయత్నించాలని ఉంది.

బలంగా తయారయ్యా...
తొలినాళ్లలో నాకు చిత్ర పరిశ్రమ గురించి అవగాహన లేదు. మా కుటుంబానికి చిత్ర పరిశ్రమతో ఎలాంటి సంబంధం లేదు. సినిమా సినిమాకీ నేర్చుకున్నా. ఇప్పుడు నటిగా మరింత ఆత్మవిశ్వాసంతో కెమెరా ముందుకెళుతున్నా. తొలినాళ్లలో చాలా సున్నితంగా ఉండేదాన్ని. చిన్న చిన్న విషయాలు హృదయం వరకు వెళ్లేవి. ఇప్పుడు మానసికంగా బలంగా తయారయ్యా. ఏ విషయాల్ని ఎలా డీల్‌ చేయాలో తెలుసుకున్నా. వ్యక్తిగా పరిశ్రమ భిన్నంగా మార్చింది. చిత్ర పరిశ్రమ అనగానే ప్రత్యేకమైన ధృక్కోణంలో చూస్తారు. కానీ ఇక్కడ సింహభాగం ప్రొఫెషనల్‌గా ఉంటారు. నాకెప్పుడూ చేదు అనుభవాలు ఎదురు కాలేదు.



Copyright 2020 USHODAYA ENTERPRISES PVT LTD, ALL RIGHTS RESERVED.
Powered by WinRace Technologies.